У 1978 годзе жыхары абласнога цэнтра адзначылі 850-годдзе першага ўпамінання аб Гродне ў Іпацьеўскім летапісе. У сувязі з гэтай знамянальнай падзеяй каля ўвахода ў парк, што на вуліцы Лермантава, быў устаноўлены памятны знак. Ён прадстаўляў сабою два слупы-абеліскі вышынёй у 31 метр, аб'яднаных у верхняй частцы блокам-вітражом з лічбай "850". У дзвух нішах, з заходняга і ўсходняга бакоў, былі змешчаны алегарычныя скульптуры воіна-латніка і жанчыны з вышытым рушніком у руках. Да помніка вядзе алея з шырокім газонам і дэкаратыўнымі свяцільнікамі. Алею адкрывае камень, на якім высечаны тыя ж лічбы - 850.

Але так было некалі. Цяпер, праз 22 гады, помнік-абеліск выглядае па-іншаму. З нішаў зніклі металічныя скульптуры воіна-латніка і жанчыны - пагоня за каляровымі металамі аказалася мацнейшай за чалавечую Памяць. Ніжняя частка слупоў спісана аўтографамі нейкіх дзікуноў, прычым, словамі зусім непрыстойнымі. Ды і ў самім парку толькі выгульваюць сабак. Гэта яшчэ раз да таго, як нашы ўлады на справе клапоцяцца аб памяці народнай.