Для таго, каб перайменаваць вуліцу Савецкую на вуліцу Ларысы Геніюш у Зэльве, на радзіме паэткі, мясцовы выканкам вырашыў правесці апытанне жыхароў горада. Справа ў тым, што ў жніўні, калі святкаваўся Дзень народзінаў паэткі, творчая інтэлігенцыя Беларусі звярнулася ў Зэльвенскі райвыканкам з прапановай аб наданні адной з вуліцаў імя славутай беларускай паэткі. І вось цяпер прыйшоў адказ ад старшыні райвыканкаму, што ў сувязі з дадзеным пытаннем праводзіцца "вывучэнне грамадскага меркавання".

Тым часам у Свята-Троіцкай царкве, што ў Зэльве, упершыню ў гісторыі праваслаўнай царквы на Беларусі ўстаноўлены мемарыяльны знак ад удзячных нашчадкаў у гонар 90-годдзя з дня нараджэння Ларысы Геніюш. Фундатарамі выступілі землякі-прадпрыймальнікі. Сакратар Гродзенскай епархіі Анатоль Ненартовіч, падчас урачыстасці адзначыў, што Ларысу Геніюш Праваслаўная царква ўзносіць не толькі як паэтку Зямлі Беларускай, але і як хрысціянку, якая пастаянна брала ўдзел у набажэнствах у гэтай царкве, як духоўна багатага чалавека. Яна перадавала людзям свае духоўныя багацці праз напісаныя творы.