Гродзенскія дэмакраты рыхтуюцца да выбараў
Пра гэта папярэдне дамовiлiся сябры незарэгiстраванага каардынацыйнага камiтэта «Гарадзенская iнiцыятыва». Камiтэт аб’ядноўвае лiдараў грамадскiх i партыйных арганiзацыяў Гродна.
Праўда, магчымасцi для дзеянняў у iх адносна невялiкiя: для выбараў дэпутатаў палаты прадстаўнiкоў iснуюць дзве гарадскiя i адна гродзенская сельская акруга, якая ўключае i частку жылых кварталаў абласнога цэнтра.
Сёння ў «Гарадзенскай iнiцыятыве» пануе прагматычны падыход да выбараў. Нiякiх iлюзiяў няма. Людзi разумеюць, што выбары будуць недэмакратычныя, што рэальных спадзяванняў на змены ў выбарчым заканадаўстве быць не можа.
Аднак большасць сябраў Каардынацыйнага камiтэта лiчаць, што ўдзельнiчаць у iх трэба. Нават дапускаючы наперад, што нiхто не пройдзе, усё адно гэта не будзе поўнай паразай, бо дэмакраты лiчаць, што самае галоўнае – гэта змяняць настрой людзей, уплываць на iхнае мысленне.
Цi ўдасца апазiцыi падзялiць памiж сабою гэтыя тры акругi напярэдаднi выбараў?
Выказвалiся дзве думкi: вылучаць па адной кандыдатуры ў кожнай акрузе цi па некалькi, у спадзяваннi, што хоць хто-небудзь ды пройдзе. У «Гарадзенскай iнiцыятывы» будзе прынамсi 10 кандыдатураў на тры акругi. Цi пагодзяцца дэмакраты пакiнуць толькi трох кандыдатаў? Цi не ўзнiкне ў кагосцi жаданне вылучацца, не зважаючы на папярэднiя дамоўленасцi? Пакуль сказаць цяжка.
Радыё Свабода