Футзал
Традыцыйны турнір у Абухава
Трэцi год запар 21-23 лiстапада ў мястэчку Абухава Гродненскага раёна адбыўся мiжнародны турнiр па футзалу на прызы газеты «Glos z-nad Niemna». Традыцыйна ў спаборнiцтвах прымалi ўдзел восем каманд са Слонiма, Брэста, Гродна, Адэльска, Абухава i Падляскага ваяводства Рэспублiкi Польшча. Не парушаючы традыцый, перамогу атрымала гродзенская «Баторыя».
Фiнал у спаборнiцтвах разыгралi два гарадзенскiя клубы: «Баторыя» i ФК «Азот». Гульня атрымалася цiкавай i вiдовiшчнай. Мацнейшымi на пляцоўцы выглядалi футбалiсты клуба «Баторыя». Яны перамаглi з лiкам 5:3. Па заканчэнню спаборнiцтва з рук галоўнага суддзi рэферы ФIФА Казiмiра Знайдзiнскага атрымалi прызы лепшы галкiпер Сяргей Парфёнчык («Баторыя»), абаронца Аляксей Андропаў (ФК «Азот»), нападаючы Якуш Сергiн (ФК «Брэст») i лепшы iгрок турнiру Алег Савiцкi.
Турнiр завяршыўся, i жыхары мястэчка будуць чакаць лiстапад наступнага года, каб пасля працы на калгасных палях зноў заспяваць «Оле – Оле – Оле».
Аляксандр ЗАЛЕЎСКI