15 сакавіка ў 22 гадзіны вечара ў Гродне адбыўся напад на штаб-кватэру Беларускага народнага фронту па вуліцы Карла Маркса, 11. Выбіты шыбы ў двух вокнах. Міліцыянты, якія праз 10 хвілінаў апынуліся на месцы здарэння, на ўчынак не адрэагавалі.

У 22.15 да старшыні гродзенскага аддзялення Беларускага народнага фронту Сяргея Мальчыка патэлефанавала незнаёмая жанчына, якая паведаміла, што ў 22.00 яна пачула звон шыбаў. Жанчына жыве побач з домам, дзе знаходзіццца штаб-кватэра БНФ. А паколькі гэта яшчэ знаходзіцца ў старым горадзе, дзе даволі добрая акустыка, то яна адразу зразумела, што недзе зазвінела шкло. Яна выйшла на вуліцу і сапраўды пабачыла, што ў двух вокнах, дзе месціцца штаб-кватэра народнага фронту павыбіваты шыбы. Побач нікога не было. У гэты ж час да месца здарэння, метраў з 30, набліжаўся нарад міліцыі. Жанчына адразу звярнулася да трох міліцыянтаў, паказала ім выбітыя шыбы і паведаміла, што чула, як адбылося здарэнне практычна 10 хвілінаў таму. У адказ ёй задалі пытанне: Вы бачылі хто гэта зрабіў? Яна адказала, што не. Тады адзін з міліцыянтаў сказаў ёй, каб ішла дадому, паколькі гэта не яе справа.