Гэты дзень з'яўляецца святам нумар адзін незалежнай Беларусі. Аднак уладамі РБ ён святочным не прызнаецца. З мінулагодніх апытанняў нашых чытачоў мы памятаем, што жыхары нашай вобласці аднак адзначаюць 25 сакавіка. Праўда, кожны па-рознаму: нехта за святочным сталом, нехта папросту ў душы, а яшчэ нехта абавязкова ідзе на мерапрыемства, якія ладзяць дэмакратычныя арганізацыі.

Сёлета прадстаўнікі дэмакратычных арганізацый Гродна падалі заяўку на правядзенне святочнага мерапрыемства за палацам Тэкстыльшчыкаў. Улады дазволілі праводзіць мітынг на тэму "За лепшае жыццё ў вольнай Беларусі", але не ў цэнтры горада, а ў Новым парку, дзе звычайна гродзенцы выгульваюць сабак. Дарэчы, для тых, хто не ведае, дзе знаходзіцца Новы парк, арганізатары аб'явілі збор у 11.30 у скверы на Савецкай плошчы за палацам Тэкстыльшчыкаў з тым, каб потым давесці людзей да месца прызначэння. Арганізатары, па іх словах, запланавалі ўрачыстасці на тры гадзіны, а ў гарвыканкаме далі дазвол толькі на паўтары. Зрэшты, пры бальшавіках так было заўсёды, а яны, як вядома, ад улады не адыходзілі, толькі называцца сталі па-іншаму - "вертыкаль". Зразумела, што увесь гар - і аблвыканкамаўскі істэблішмент удзелу ў падобных святах не бярэ. Туды пасылаюць толькі ўзмоцнены нарад міліцыі. Вось яны з году ў год і святкуюць з беларускім народам ягоныя святы. Сёлета арганізатары падрыхтавалі святочныя сюрпрызы для ўдзельнікаў мітынгу і збіраюцца падвесці вынікі таго, як мясцовыя ўлады рэагуюць на патрабаванні рэзалюцый мінулых мітынгаў.