Зельва
«Праўда-посах пільгрыма...»
Йду шляхамі крутымі,
У небе зоры мігцяць,
Праўда-посах пільгрыма
У бездарожжы жыцця...
-так пісала славутая паэтка Ларыса Геніюш. Угодкі з дня яе смерці, якія заўжды адзначаюцца на Зэльвеншчыне беларускай грамадскасцю 7 красавіка на праваслаўнае свята Дабравешчанне сёлета прайшлі амаль непрыкметна.
Толькі ад прыхільнікаў яе таленту на магіле з'явіліся кветкі.
Між іншым, яшчэ ў мінулым годзе атрымаўшы доступ да архіваў КДБ і азнаёміўшыся са "справай" сям'і Геніюш, Беларускі Хельсінскі Камітэт хадайнічаў аб вынясенні пратэсту на прыгавор судовай калегіі па крымінальных справах Вярхоўнага Суда БССР ад 7 лютага 1949 года ў адносінах Івана і Ларысы Геніюш на прадмет яго адмены, паколькі доказу аб іх злачыннай дзейнасці ў матэрыялах справы не маецца... Прыкра, але вядомая ў свеце беларуская паэтка да гэтых дзён застаецца ў ліку ворагаў народа.
Дарэчы, сёлета будзе адзначацца 90-годдзе з дня нараджэння Ларысы Геніюш. Як і заўжды збяруцца паэты, прадстаўнікі беларускай творчай інтэлігенцыі, але, паверце, хочацца каб угодкі з дня нараджэння прайшлі без тых, хто робіць на яе імя сабе "рэкламу" асабліва ў апошні час, а ў шчырым асяродку тых, хто штогод як і ў 90-я гады прыязджаў каб наталіцца той вернасці беларускай зямлі і роднаму слову, высокай чалавечай годнасці.
|