У мінулую пятніцу ў дзень Яна Хрысціцеля ў мястэчку Пагранічны Бераставіцкага раёна міліцыянты спрабавалі перашкодзіць набажэнству ў Беларускай Народнай Праваслаўнай царкве.

У мінулым нумары "БИ" паведамляла аб тым, што вернікі Пагранічнага паставілі вайсковую палатку ў прыватным агародзе і збіраюцца там на набажэнствы. Мясцовыя ўлады не жадаюць рэгістраваць прыход Беларускай Народнай Праваслаўнай царквы і стараюцца перашкаджаць яе дзейнасці. Тым не менш, у пятніцу мясцовыя людзі ішлі на набажэнства з кветкамі, каб павіншаваць свайго бацюшку - Яна Спасюка. У гэты дзень з Бераставіцы прыехалі дзьве міліцэйскія машыны, а таксама намеснік райвыканкама спадар Дудко. Адну з машын міліцыянты паставілі побач з уваходам, каб псіхалагічна паўздзейнічаць на прыхажан. Аднак, ніхто не спалохаўся. Спадар Дудко таптаўся разам са світай побач з палаткай, але ўвайсці так і не рашыўся. Тым не менш быў складзены пратакол, які бацюшка адмовіўся нават чытаць. Начальства ад'ехала заставіўшы толькі супрацоўнікаў міліцыі. Тыя пасля сканчэння набажэнства рабілі відэаздымкі на камеру, тым самым працягваючы псіхалагічна ўздзейнічаць на бацюшку і прыхажан. Інцыдэнт скончыўся, як у мастацкай стужцы: святар адводзячы сваю паству ад міліцыянтаў крыкнуў апошнім "адыдзіце антыхрысты" і апырснуў іх святой вадой. У той самы дзень міліцыянты забралі ў святара дакументы на ўласны аўтамабіль, але ўвечары вярнулі, папрасіўшы прабачэння.