Першага лістапада на Дзяды падчас ускладання кветак да помніка Янкi Купалы ў Гродне былі арыштаваны 23 чалавекі і дастаўлены ў Ленінскі РАУС. Міліцыя паводзіла сябе надзвычай жорстка і безапеляцыйна.

Яшчэ днём актывісты Беларускага народнага фронту, Грамады, Маладога фронту і Маладой Грамады абыйшлі гро- дзенскія могілкі: усклалі кветкі і запалілі знічы на магілах нашых слаўных землякоў, як і прынята ў народнай традыцыі. Увечары знічы былі запалены на чыгуначным вакзале побач з памятнай шыльдай паўстанцам 1863 года. Пасля гэтага група прыкладна з трыццаці чалавек арганізавана па тратуарах накіравалася да помніка Я.Купалы. Тут таксама паспрабавалі запаліць знічы і развярнулі бела-чырвона-белыя сцягі. Раптам да помніка пад'ехала каля дзесяці міліцэйскіх машынаў, з якіх пачалі выскокваць людзі ў форме і арыштоўваць сабраўшыхся. Тым, хто не пагаджаўся, дасталося асабліва цяжка. Некаторых павалілі на мокры асфальт, адзелі кайданкі і сілком уцягнулі ў машыны. Актывістцы Маладой Грамады Святлане Нех пашкодзілі палец. 23 чалавекі завезлі ў Ленінскі РАУС, на ўсіх склалі пратаколы. Праўда, затрыманыя дружна адмовіліся іх падпісваць. Дваім актывістам БНФ – Пятру Анісімовічу і Міколе Ворану – выпісалі позвы ў суд на наступны дзень за арганізацыю несанкцыянаванага шэсця. Людзей пратрымалі ў пастарунку каля дзьвух гадзін, пасля чаго адпусцілі.