Два дні прастаяў крыж на месцы знішчанага ў 1961 годзе па рашэнні партыйных уладаў касцёла ў Гродне ў скверы на плошчы Савецкай. Як паведаміла «БИ» у мінулым нумары, крыж быў устаноўлены ў ноч з 28 на 29 лістапада невядомымі. Яго паставілі ў тую самую ноч, калі 39 гадоў таму касцёл узарвалі.

Вернікі ўжо маліліся побач з ім і папрасілі ксяндза асвяціць яго. Адзін з гарадскіх чыноўнікаў у інтэрв’ю гродзенскаму радыё назваў гэта палітычнай акцыяй. Пасля гэтага крыж быў скрадзены ў цёмны час сутак. Праясніць сітуацыю «БИ» спрабавала ў гарадскіх уладаў, аднак чыноўнікі аднадушна адказвалі, што не валодаюць ніякай інфармацыяй.