25 лютага ў Новым замку ў Гродне адбылася прэзентацыя навуковай гістарычнай кнігі «Стварэнне Вялікага Княства Літоўскага». Яе аўтар – вядомы ў горадзе навуковец Алесь Краўцэвіч. Гэта ягоная доктарская дысертацыя, якая другім выданнем выйшла ў Польшчы.

Першае выданне гэтай працы ў чэрвені 1998 г. адбылося хоць пад тытулам дзяржаўнага выдавецтва «Беларуская навука», але прыватным чынам з нагоды фінансавых цяжкасцяў (Дзяржкамдрук Беларусі адмовіў у фінансаванні кнігі). Наклад склаў каля 300 асобнікаў, а не 2 тысячы як пададзена выдавецтвам. Мінуўшы два гады, высветлілася, што попыт на працу аказаўся значна большым за прапанаваны наклад, чым і была выклікана арганізацыя другога выдання. Праблема ўтварэння ВКЛ – адна з самых важных у гісторыі Беларусі, паколькі ў гэтай дзяржаве адбылося фарміраванне беларускага народа.