Алiмпiяда складалася з трох тураў. Першы з iх – водгук на лiтаратурны твор, другi – лiнгвiстычны конкурс. Трэцi тур, па словах многiх удзельнiкаў, самы складаны– вуснае выказванне. Гэты тур патрабуе не толькi дакладнага ведання мовы, але i агульнай эрудыцыi i нават артыстызму.

Усе каманды, як адзначыла на закрыццi алiмпiяды журы, выступiлi годна. Амаль кожная з iх павезла дадому дыпломы. Але ўсё ж такi найбольшую колькасць дыпломаў атрымалi прадстаўнiкi каманды Гродзенскай вобласцi. Трэба адзначыць, што гэта ўжо 13-ы год, калi каманда нашай вобласцi прывозiць з сабой з алiмпiяды такую перамогу.

Для «алiмпiйцаў» была арганiзавана экскурсiя на шклозавод у Бярозаўцы. Наведалi яны таксама i Лiдскi краязнаўчы музей, а ў вольны ад конкурсаў i экскурсiй час яны маглi пазнаёмiцца з цiкавымi мясцiнамi горада.

Рэдакцыя «БI» вiншуе нашых землякоў з перамогай i добрымi ведамi роднай мовы i лiтаратуры. Ганарымся вамi. Так трымаць!

Г.ЯНКУТА

Фото www.irex.minsk.by