Гастролi

Акцёры Гродзенскага тэатра лялек нядаўна вярнулiся з Варшавы, дзе са спектаклем «Неверагодны iлюзiён» яны выступалi ў тэатры «Гулiвер». Арыгiнальнае тэатральна-лялечнае шоу, якое прывезлi ў польскую сталiцу беларускiя акцёры, прыйшлося даспадобы гледачу.

Дарэчы, «Неверагодны iлюзiён» – гэта рэжысёрская праца Алега Жугжды, якi паставiў i спектакль «Паэма без слоў», прэм’еру якога толькi што ўбачылi гродзенцы. Спектакль гэты па матывах драматычнай паэмы Янкi Купалы. Ставiўся ён i раней, але не меў багатага сцэнiчнага лёсу. Яго уключалi ў свой рэпертуар як аматарскiя гурткi, так i славуты Купалаўскi тэатр. Працаваў над гэтай пастаноўкай таксама i наш абласны драматычны тэатр. I вось зараз прэм’ера на сцэне Гродзенскага тэатра лялек. Рэжысёр Алег Жугжда пастараўся зрабiць спектакль больш сучасным, дзеля чаго давялося ўвесцi ўспектакль як мага больш элементаў пантамiмы i балету. У новай пастаноўцы заняты акцёры Ларыса Мiкулiч, Васiль Прабадзяк, Iван Добрук, Вячаслаў Корнеў, Людмiла Паўлоўская, Святлана Баброўская, якiя сапраўды творча працавалi над гэтым спектаклем. Гэтак жа, як i мастак Ларыса Мiкiна. Арганiчна ўвайшла ў пастаноўку музыка Паўла Кандрусевiча.