У чацвер з гродзенскага спецпрыёмнiка на волю павiнен выйсцi старшыня Руху дэмакратычных сiлаў «Гарадзенскi выбар» Дзмiтрый Iваноўскi. За ўдзел у акцыi «Ланцуг неабыякавых людзей» судом Ленiнскага раёна ён быў асуджаны на 10 сутак. Усе 10 сутак Дзмiтрый трымаў галадоўку. Перадачы яму часта прыносiлi незнаёмыя людзi, якiя нават не ведалi ягонага прозвiшча.

Адзiным, каму дазволiлi сустрэчу з Дзмiтрыям у спецпрыёмнiку, стаў старшыня Гродзенскай фiлii Беларускага Хельсынскага камiтэту Аляксандр Антанюк. У судзе ён выступаў у якасцi абаронцы. Па словах Антанюка, Дзiма выглядаў бадзёрым, жартаваў i нi на што не скардзiцца. Пiў выключна мiнеральную ваду i нават кiнуў палiць. Дарэчы, тыя, хто добра ведае Дзiму не здзiўлялiся таму, як ён трымаецца, паколькi ў жыццi гэта выключна сцiплы, абавязковы i шчыры чалавек. Усе харчы i сокi, якiя яму перадаюць знаёмыя i незнаёмыя людзi, ён аддае сваiм сукамернiкам. Аляксандр Антанюк распавядаў, што перадачы Дзiме прыносiлi людзi, якiя яго не ведаюць, паколькi прасiлi ў мiлiцыянтаў перадаць iх Дзмiтрыю Завадскаму, якi, маўляў, стаяў на Савецкай вулiцы ў пiкеце. Як правiла, па словах Антанюка, гэтыя людзi сталага веку.