Ва ўзножжы ўмураваная гранiтная дошка з выявай Пагонi i тэкстам: «На гэтым месцы ў 1659 годзе шляхта Лiдскага павету дала бой 30-тысячнаму маскоўскаму войску, засланiўшы сабой шлях на Горадню i Лiду. Вечная слава змагарам за незалежнасць Бацькаўшчыны».

На адкрыцьцё сабралася прыблiзна 100 чалавек, пераважна мясцовыя жыхары. Белiцкi ксёндз Ян асвяцiў крыж. У ганаровай варце стаялi ветэраны Армii Краёвай. Пазней iх змянiлi ўдзельнiкi рыцарскага клубу «Дайнова» з Лiды. Луналi бел-чырвона-белыя сцягi i сцяг з эмблемай Таварыства беларускай мовы.

На адкрыцьцi выступiў старшыня БНФ «Адраджэньне» Вiнцук Вячорка. Ён звязаў падзеi 17 стагоддзя, калi маскоўскае войска знаходзiлася на беларускiх землях, з сённяшнiмi. Спадар Вячорка зазначыў, што заўсёды важна баранiць незалежнасць – i тады, i цяпер, калi Расiя iзноў хоча паглынуць Беларусь.

Старшыня Лiдскай гарадской арганiзацыi партыi БНФ Станiслаў Суднiк прачытаў свой верш, прысвечаны лiдскай шляхце. У лiстападзе 1659 яна суткi трымала каля броду праз Нёман войска, якое колькасна пераўзыходзiла яе ў дзесяць разоў.

Пасля асвячэння крыжа ў белiцкай каплiцы адбылася iмша на беларускай мове – яна была прысвечаная змагарам за незалежнасць, якiя палеглi ва ўсiх войнах. Iнiцыятарам мерапрыемства выступiла Лiдская арганiзацыя Таварыства беларускай мовы.

Сяргей АСТРАЎЦОЎ, Радыё Свабода