У мiнулы чацьвер споўнiлася 10 год з дня смерцi вядомага беларускага гiсторыка, грамадскага дзеяча i выдатнага чалавека – Мiхася Ткачова. З гэтае нагоды ў гродзенскiм гарадскiм Доме культуры на паседжаннi клуба «Паходня» адбылася ўрачыстая вечарына ягонай памяцi.

Зала ў ГДК была запоўненая, нягледзячы на тое, што «Паходня» апошнiм часам практычна не збiраецца. Арганiзатарамi гэтай вечарыны выступiлi былыя вучнi прафесара М.Ткачова. Яны якраз найбольш распавядалi аб iм, як аб выкладчыку, грамадскiм дзеячы i чалавеку. Г.Семянчук, выкладчык гiсторыi ўнiверсiтэта iмя Я.Купалы прадставiў кнiгу, прысвечаную М.Ткачову, якая была выпушчана спецыяльна да гэтай даты. Як зазначыў Г.Семянчук, кнiга павiнна стаць своеасаблiвым «помнiкам» выдатнаму навукоўцу. Кнiга мае назву на лацiнскай мове – «Castrum, urbis et bellum», што ў перакладзе азначае – Замак, горад, вайна. Гэта якраз тая тэматыка, якой займаўся М.Ткачоў. У кнiзе змешчаны артыкулы вядомых i маладых беларускiх, лiтоўскiх, латышскiх i польскiх даследчыкаў, археолагаў, гiсторыкаў, мастацтвазнаўцаў. Упершыню друкуецца i артыкул М.Ткачова, прысвечаны сярэднявечнай гiсторыi Чачэрска.