На тэрыторыі губерніі ў 1899 годзе дзейнічала 26 бібліятэк, з іх 20 былі адкрыты пры кніжных крамах у Гродне, Беластоку, Слоніме, мястэчках - Друскеніках, Заблудава, Картуз-Бяроза, Ружанах. У Гродне працавала першая публічная бібліятэка ў Беларусі, якая была адкрыта яшчэ ў 1863 годзе, а пры кніжных крамах налічвалася яшчэ чатыры. Гродзенская публічная бібліятэка існавала за кошт сяброўскіх складак, аплаты падпісчыкаў і добраахвотных ахвяраванняў. Сродкі бібліятэкі за 14 гадоў яе існавання налічвалі ад 206 да 250 рублёў у год. З 1877 года бібліятэка пачала атрымліваць штогадовую субсідыю ад урада ў памеры 800 рублёў. Са справаздачы бібліятэкі за 1899 відаць, што яна мела: гадавых сябраў - 10, падпісчыкаў - 1195, наведвальнікаў чытальні - 7758, у тым ліку платных - 532. У фондзе на 1 студзеня 1900 года налічвалася кніг і асобных сачыненняў 2832 у 4108 тамах, часопісаў 105 у 4779 тамах.

За год у бібліятэку паступіла на прыход 1655 рублёў 84 капейкі, патрачана 1414 рублёў 83 капейкі.

Наведвальнікаў абслугоўваў бібліятэкар і яго памочнік.

Станіслаў МІХАЛЬЧЫК