Пасля выкладу спадар Шчукін адказваў на пытанні. Напрыклад, журналісты даведаліся, што калі б ён атрымаў доступ да ўлады, перш за ўсё пабудаваў бы новыя турмы. "Цяперашнія знаходзяцца ў такім жахлівым стане, што перарабіць іх проста немагчыма". Да таго ж, па словах Шчукіна, зараз амаль палова ўсіх зняволенных сядзіць ні за што. А турмы, на жаль, патрэбныя заўсёды, у кожным грамадстве.

Валерый Шчукін паведаміў таксама, што не баіцца новага прэзідэнцкага дэкрэта №40, паводле якога ў мэтах забеспячэння кампенсацыі страты, нанесенай дзяржаве, у асобы, якая гэтую страту нанесла, канфіскуюць маёмасць. "Мне проста няма чаго траціць. Я нават кватэры ўласнай не маю".

На пытанне, ці бачыце вы асобу, якая магла б стаць прэзідэнтам у незалежнай Беларусі, ён адказаў, што бачыць, і нават дзве. Аднак імёны гэтых людзей ён не называе, таму што баіцца за іх. "Цяпер часта знікаюць асобы, якія б маглі быць рэальнымі канкурэнтамі сённяшнім беларускім уладам".

Спадар Шчукін узгадаў і пра гімн "Магутны Божа". Ён сказаў, што вельмі паважае ягоную аўтарку Наталлю Арсенневу, аднак больш яму падабаецца "Інтэрнацыянал". "І не толькі таму, што я камуніст. Проста я лічу, што трэба самім будаваць жыццё, а не чакаць Божае дапамогі".

І.А.