Дзесятага студзеня Гродзенская праваслаўная епархія ўрачыста адзначыла сваё 100-годдзе з дня ўтварэння. Урачысты сход з гэтае нагоды адбыўся ў абласным драматычным тэатры. Напярэдадні ў Свята-Пакроўскім саборы адбылося ўрачыстае набажэнства, якое праводзіў Мітрапаліт Мінскі і Слуцкі Экзарх усяе Беларусі Філарэт. Старшыня Гродзенскага аблвыканкама перадаў епархіі ў падарунак 2 мільярды рублёў.

На юбілейным сходзе ў абласным тэатры, акрамя духавенства і прыхажан, прысутнічаў старшыня Гродзенскага аблвыканкама А.Дубко, кіраўнік Камітэта па справах рэлігій і нацыянальнасцяў РБ А.Білык. Урачыстасці з зачытвання віншавальнага пісьма ад патрыярха Маскоўскага і Усяе Русі Алексія ІІ зачытаў мітрапаліт Мінскі і Слуцкі Філарэт. У пасланні гучалі цёплыя словы віншавання для вернікаў і духавенства, нагадвалася гісторыя ўтварэння епархіі, а таксама выказвалася ўпэўненасць у тым, што праваслаўе на Гродзеншчыне адраджаецца. Асобна Алексій ІІ у сваім пасланні вітаў старшыню Гродзенскага аблвыканкама А Дубко, зазначаючы, што адносіны паміж царквой і ўладамі цяпер, як ніколі, добрыя. Здзівіла толькі тое, што патрыярх Маскоўскі і Усяе Русі ў сваім афіцыйным пасланні называе старшыню аблвыканкама -губернатарам. Напэўна, у ягонай канцэлярыі не ведаюць, што ў Беларусі тэрытарыяльна-адміністратыўныя дзяленні называюцца абласцямі. Ад імя Алексія ІІ Мітрапаліт Філарэт уручыў кіраўніку вобласці царкоўную кнігу з надпісам: "Его Превосходительству, губернатору А.Дубко в связи со 100-летием Гродненской епархии…". Акрамя гэтага А. Дубко дастаў у падарунак і пазалочаную талерку з выявай Раства Хрыстова.