Дзьмiтры Iваноўскi, адзiн з самых цiкавых гродзенскiх мастакоў, старшыня таварыства вольных майстраў, актыўны сябра мясцовай арганiзацыi БНФ «Адраджэньне» стаўся насамрэч самым што нi ёсць вольным мастаком. Гродзенскiя ўлады адабралi ў яго творчую майстэрню.

Па пошце мастак атрымаў афiцыйную паперу з ЖЭСа №5, у якой гаворыцца, што да 10 мая ён павiнен вызвалiць займаемае памяшканне. У сваiм прадпiсаннi ЖЭС абапiраецца на ўказ прэзiдэнта №302 ад 12 жнiўня 1996 года. У суадносiнах з гэтым указам Гродзенскi аблвыканкам выключыў мастака са спiску ўладальнiкаў творчых майстэрняў, якiя карысталiся iльготамi на арэндную плату. Цяпер замест арэнднай платы ў памеры 20-25 тысяч рублёў, мастаку неабходна плацiць суму роўную прыкладна 150 далярам у месяц.