16 лiпеня Гродна адзначыў 57-ю гадавiну вызвалення ад фашыстаў.

Святочныя мерапрыемствы адбывалiся ў нядзелю. Упершыню яны ладзiлiся на левым беразе Нёмана побач з цеплаходным прычалам. Арганiзацыя свята нiчым асаблiвым не адрознiвалася, але, вiдавочна, што месца было абрана ўдалае, паколькi практычна ўсе выяздныя кiёскi са столiкамi знаходзiлiся ў цянi пад старымi разгалiстымi дрэвамi. Вiншаваў ветэранаў, гродзенцаў i гасцей старшыня гарвыканкама А.Пашкевiч. Затым слова ўзяў ветэран II сусветнай вайны Г.Арцем’еў, якi ўдзельнiчаў у 1944 годзе ў вызваленнi нашага гораду. Дарэчы, менавiта ён i распавядаў, што горад наш быў вызвалены ад немцаў не 16 лiпеня, як мы адзначаем, а пазней. 16 лiпеня войскi Чырвонай армii занялi толькi правабярэжную частку горада i ў гэты ж дзень голас Левiтана ад савецкага iнформбюро паспяшыў перадаць, што Гродна ўжо вызвалены. Насамрэч, як распавядаў Г.Арцем’еў, баi ў раёне тытунёвай фабрыкi вялiся яшчэ 24 лiпеня. Прычым, па яго словах, гэта былi вельмi цяжкiя баi, дзе палегла шмат салдатаў i афiцэраў. Наогул пры вызваленнi Гродзеншчыны загiнула больш 30 тысяч чалавек.