Старшыня Свiслацкага райвыканкама Анатоль Кузьма, якi здолеў за час свайго кiравання раёнам з 1996 года аднавiць на Алеi герояў бюст Сталiну, знаходзiцца пад пагрозай адстаўкi.

Адразу зазначу, што нiводзiн з раённых i абласных чыноўнiкаў не пагадзiўся пацвердзiць, што iснуе загад аб адстаўцы А.Кузьмы. Праўда, нам усё ж удалося паразмаўляць з кiраўнiком Упраўлення справамi райвыканкама С.Гулевiчам, якi напачатку падцвердзiў, што ў аўторак ранiцай прыйшоў факс з Гродзенскага аблвыканкама за подпiсам старшынi аблвыканкама У.Саўчанкi аб адхiленнi А.Кузьмы з пасада старшынi райвыканкама «за парушэнне дзейнiчаючага заканадаўства». Пазней чыноўнiк спахапiўся i папрасiў перазванiць пазней. А пазней ён наогул адмовiўся даваць якую-небудзь iнфармацыю, маўляў, тэлефануйце ў аблвыканкам. А там, як заўсёды, «не мешайте работать», «к нам еще ничего непоступало». I толькi намеснiк старшынi аблвыканкама М.Прысада параiў нам звярнуцца за каментарам да У.Саўчанкi, спаслаўшыся на тое, што не валодае сiтуацыяй, паколькi знаходзiўся ў камандыроўцы.