«Разлiчваю на перамогу, магчыма, нават у першым туры»,– заявiў у iнтэрв’ю Радыё Свабода адзiны кандыдат на прэзыдэнцкiх выбарах ад шырокай грамадзкай каалiцыi Ўладзiмiр Ганчарык.

– Скажыце, якiя вашыя планы на блiжэйшыя некалькi тыдняў?

– Стварэнне штабу i вызначэнне далейшых кiрункаў працы.

– Як будуць аб’ядноўвацца штабы iншых сяброў «пяцёркi» разам з вашым. Як гэта будзе адбывацца?

– Ужо цяпер iдуць кансультацыi i ёсць пэўныя дамоўленасцi.

– Вы не заўважылi нейкiх крыўдаў з боку iншых прадстаўнiкоў пяцёркi? Усё нармальна?

– Не гэта ж галоўнае, што там ёсць нейкiя крыўды. Я думаю, што ў iнтарэсах агульнае справы наогул не трэба каб яны былi.

– Мы чулi ваш галоўны лозунг: «Дабрабыт у кожны дом». А якiя iншыя, не менш важныя?

– Ёсць i такi: «Каб былi хлеб i чарка – галасуйце за Ганчарыка!» (смяецца) – i такi будзе. Сёння адзiн паэт прынес.

– Прадстаўнiкi палiтычных партый, у прыватнасцi АГП, БНФ падтрымлiваюць вылучэнне вашай кандыдатуры, але хочуць каб вы прадставiлi iм гарантыi, што Беларусь застанецца незалежнай у вынiку вашай перамогi, што будзе развiвацца беларуская мова, што будзе рэфармавацца эканомiка паводле еўрапейскiх стандартаў. Цi можаце вы даць такiя гарантыi i цi збiраецеся гэта рабiць?

– Безумоўна ж. Тут няма нiякага сумневу. Справа не ў гарантыях. Справа ў маiх поглядах, справа ў нашых дзеяннях. Справа не толькi ў тым, што мы на словах нешта зробiм цi на паперы нешта напiшам.

– У апошнiм «Рэзанансе» па БТ пра вас гаварылi, што вы былы камунiст, партыйны функцыянер, што вам 62 гады... Якiя вашыя погляды, i што б вы адказалi тым, хто называе вас былым партыйным функцыянерам?

– Справа не ў тым, кiм хто быў, справа ў тым, якiя ён пазiцыi займае цяпер. Я думаю, што гэта тыя шоры, якiя мусяць скiнуць з сябе гэтыя ўсе «рэзанатары», паглядзець, што адбываецца вакол, напрыклад, у краiнах Прыбалтыкi, якiя там людзi прыйшлi, як яны працуюць. А што датычыць майго веку, я разглядаю такiя выказваннi, наогул, як непавагу да людзей, якiя маюць сталы век, але маюць яшчэ i такiя дадзеныя, як мудрасць, разважлiвасць, сiлу, вопыт i гэтак далей. I калi гэта параўнаць з тымi, хто мае толькi фiзiчныя моцныя ногi ды iншае – я думаю, што ў мяне не менш такiх добрых перавагаў.

– Тым не менш, якое ваша стаўленне да спорту?

– Вельмi добрае. У мяне былi спартовыя разрады, я займаўся бегам, i цяпер падтрымлiваю добрую форму...

– Цi выпiваеце вы, цi палiце?..

– Не, не палю, а чарку магу выпiць калi трэба. Толькi – з добрымi людзьмi.

– На якi працэнт галасоў у гэтай кампанii вы разлiчваеце?

– Я не буду казаць пра працэнты. Я разлiчваю на перамогу.

– На першы тур цi на другi?

– Можа адбыцца ў першым туры, можа – калi зробiм усё як трэба, як дыктуе цяперашняя сiтуацыя.

– На ваш погляд, на тое, што вас вылучылi адзiным кандыдатам – як паўплывала, што менавiта вы вылучылi прэтэнзii да ўлады ў знiкненнi людзей, здабылi i апублiкавалi гэтыя дакументы?

– Не, гэта не галоўнае. Напэўна, гэта прыцягнула ўвагу, але былi больш сур’ёзныя прычыны. Гэта было ўлiчана.

– Як вы акрэслiваеце рэакцыю на гэтыя апублiкаваныя вамi дакументы?

– Калi з боку ўлады – вы бачыце, якая рэакцыя. Наогул – цi маўчанне, цi ўсялякая знявага... А грамадзтва, я думаю, яшчэ задумаецца, што адбылося ў нашай дзяржаве.

– Асабiста вы, уступаючы ў такую жорсткую барацьбу, таксама павiнны прыняць нейкiя захады ў забеспячэннi сваёй бяспекi?

– Ну, безумоўна, безумоўна.

Валер Калiноўскi, Радыё «Свабода»

Photo IREX/ProMedia www.irex.minsk.by