Міліцыянеры падманваюць затрыманых
На мiнулым тыднi супрацоўнiкамi мiлiцыi было затрымана 13 чалавек. Аднаго сябра БНФ, трох сяброў незарэгiстраванай арганiзацыi Гродзенскi Малады Фронт i восем непаўнагадовых хлопцаў.
Затрыманнi пачалiся ў пятнiцу 31 жнiўня ўвечары. «Бралi» дзяцей. Па чарзе. Канфiскоўвалi буклеты з эмблемай «Выбiрай», налепкi i агiтацыйны матэрыял кандыдата ў прэзiдэнты Ў.I. Ганчарыка. Потым адпускалi. I так восем чалавек. У гэты ж дзень быў затрыманы адзiн з сяброў БНФ «Адраджэнне». А вось аднаго з каардынатараў штабу незалежнага назiрання Кастрычнiцкага раёна г. Гродна Адольфа Зацэпiна ўдалося «адбiць» у двух грамадзян у цывiльным. На гэтым затрыманнi не скончылiся. У нядзелю другога верасня ў цэнтры горада мiлiцыянеры вырашылi забраць у пастарунак трох сяброў незарэгiстраванай арганiзацыi Гродзенскi Малады Фронт.Што паспяхова i зрабiлi.
Прычына – аранжавыя кепкi з эмблемай «Выбiрай». Двух хлопцаў i дзяўчыну ў пастарунку пратрымалi амаль дзве гадзiны. Пад час якiх маладым людзям даказвалi, што агiтацыйная кампанiя ўжо скончылася i яны не маюць права хадзiць у кепках. Кепкi забралi. А наконт агiтацыйнай кампанii...Яна працягваецца i будзе працягвацца да суботы. Уключна. Выходзiць, падманулi мiлiцыянеры юнакоў...
Вiка Майская
|