Па-другое, мы не чулi, каб беларусы ў РФ мелi беларускi тэатр цi трупу. А чаму? Мы ж, здаецца, у Саюзе з Расiяй? Цi гэта не так? I калi так, то чаму так адбываецца?

Мае сваякi прыязджаюць з Расii (дзядзька жанаты на рускай) i дзiвяцца, што ў нас няма нi рускай, нi беларускай мовы, i называюць гэта «жлабiзмам». А мне, вядома, крыўдна, як i маёй жонцы i бацькам. Чаму мы, праваслаўныя, не чуем беларускай мовы нават у божым храме. I чаго пасля гэтага праваслаўныя япiскапы лямантуюць, што насельнiцтва кiдаецца ў каталiцызм?

А яшчэ. Чаму ў Маскве не ўвекавечылi ў назвах вулiц ледзь не ўсiх беларускiх пiсьменнiкаў i дзеячоў культуры, як гэта зроблена ў нас. I куды глядзiць наш прэзiдэнт, калi расiяне не хочуць рабiць беларускую мову другой дзяржаўнай у РФ?

Просьба да рэдакцыi «БI»: калi ласка, змясцiце на сваiх старонках матэрыялы, як жывуць беларусы ў Расii, цi ведаюць i памятаюць яны родную культуру i мову, цi ёсць наогул у iх нейкае культурнiцкае жыццё, цi можа яны наогул ужо забылiся, што нарадзiлiся на гэты свет беларусамi.

З павагай Вiктар i Соф’я Аўдзiевiчы

Ад рэдакцыi

А што, панове прыхiльнiкi саюзаў, насамрэч адкажыце нашым чытачам на гэтыя простыя пытаннi. Больш таго, падобныя лiсты не рэдкасць у рэдакцыi. Людзi пiшуць нам не толькi аб тым, што ў iх малыя заробкi, што няма чым кармiць сям’ю, што цячэ дах над галавой, папэнкалi трубы, што iх аблiчваюць у крамах, дзяруць хабары, ашукваюць чыноўнiкi, што ўвесь час жыццё даражэе, а заробку не дабаўляецца. Ёсць i такiя лiсты, у якiх хваляванне i неспакой за будучыню культуры i нацыi. Мы з задавальненнем прадаставiм месца ў газеце тым, хто пазачыняў у Гродне беларускiя школкi, садкi, хто паздымаў беларускiя шыльды, хто дагэтуль абразлiва каверкае беларускую мову i насмяхаецца над усiм беларускiм. Скажыце на нашых старонках не толькi аб тым, чаму ў нас няма мовы, але чаму нiзкiя заробкi i пенсii, чаму дарогi i тратуары зiмой не чышчаныя ў горадзе, чаму транспарт дрэнна ходзiць. У 1995 годзе ў гэтым была вiнаватая беларуская мова. Вы так крычалi ва ўвесь голас. А хто вiнаваты цяпер?

Дарэчы, мы з задавальненнем прадаставiм месца на старонках «БI» i iнтэгратарам з Расii. Абгрунтуйце свае памкненнi, як вы ў Саюзе збiраецеся захаваць нашу культуру i мову, якое месца вы для iх рыхтуеце. Пра гэта ж нiхто не кажа, а людзям цiкава, яны пытаюцца i хочуць зразумець. Вы прыдумалi, вы i патлумачце. А то атрымлiваецца, як 80 гадоў таму, банда бальшавiкоў зрабiла пераварот у Расii, устанавiла свой рэжым, а потым высветлiлася, што цэлыя пакаленнi, мякка кажучы, пражылi не так.

Цiкава было назiраць падчас вiзiту Пуцiна ў Польшчу, калi ён ускладваў вянок да помнiка воiнам Армii Краёвай, казаў аб тым, што ў савецкiя часы несправядлiва ставiлiся да палякаў i iншых народаў. Прэзiдэнт Расii прызнаваў несправядлiвасць, i гэта заслугоўвае павагi. Дарэчы, размаўлялi абодва прэзiдэнты аб тым, што адбываецца ў Беларусi. А гэта ўжо многага варта, калi iх увагу прыцягвае незразумелы лёс нашай краiны. Можа варта задумацца, панове iнтэгратары. Як бы пазней наступнаму расiйскаму прэзiдэнту, а можа нават i гэтаму, не казаць тое самае беларусам, што ўжо казаў палякам. I хоць нам пакуль нiхто i не казаў аб тым, за што раскулачылi нашых продкаў i павывозiлi ў сiбiр, пастралялi ў Курапатах.., мы спадзяёмся, што нашы суседзi як бы i самi ўсё выдатна разумеюць, таму што пацярпелi не менш.

Зрэшты, мы заклiкаем усiх зацiкаўленых выказвацца на старонках «БI» па гэтых пытаннях. Трэба, каб людзi ведалi.