Мифы Авторынок Гостевая Редакция Контакт Архив

Обновление каждый четверг  

Выстава

Каралеўскія гісторыі

Выстава, аналагаў якой яшчэ ў Гродне не было – «Дзевяць каралей» . Яе аўтар – гродзенскi мастак Аляксандр Сiльвановiч. Усе карцiны, ад першай да апошняй, аўтар прысвяцiў адной, але вельмi шматбаковай тэме – каралi.

Белы верш на цэнтральнай карцiне быццам запрашае гледачоў глыбей зазiрнуць у таямнiчы свет гiсторыi, народжанай аўтарскай фантазiяй, распавядае пра кожную працу кароценькiм радком:

«Першы кароль – палюе на звера,

Другi кароль – коннiк у ночы,

Трэцi кароль – валодае снамi,

Сiнiм, чырвоным, белым i чорным,

Чацверты кароль – вандруе пры зорах,

Пяты – птушыны – гуляе з паветрам,

Семы кароль – з вялiкаю рыбай,

Восьмы – хаваецца маскай штоўскай,

Дзевяты кароль – пачынае ўладарыць,

Дождж залаты на яго i карона.»

Урачыстыя, самавiтыя, непадобныя адзiн на аднаго паўстаюць перад гледачамi каранаваныя героi выставы. Мабыць, старажытная Вiзантыя цi Сярэднявечная Еўропа навеялi мастаку тэму i вобразы для сваей новай выставы. Арганiчна ўлiлася экспазiцыя ў сцены галерэi, ператварыўшы апошнюю на нейкi час у гатычную сярэднявечную залу.

Аляксандр Сiльвановiч – адзiн з найцiкавейшых мастакоў Гродна ў плане сваей творчай дзейнасцi. Кожная выстава – гэта своеасаблiвая падзея ў культурным жыццi. У Гродна, дзе нарадзiўся, вярнуўся пасля навучання ў Беларускай Акадэмii мастацтваў, скончыўшы аддзяленне манументальна-дэкаратыўнага мастацтва ў 1992 годзе. У 2000 годзе ўзнагароджаны прэмiяй Гродзенскага аблвыканкама «За творчыя дасягненнi ў галiне культуры i мастацтва» як лепшы мастак года.

Аляксандр Сiльвановiч – сталы мастак са склаўшымся асабiстым поглядам на свет i мастацтва, i кожная яго выстава – вынiк загадзя спланаванай працы. Гэта перанесеныя на палатно вобразы, на якiя натхнiлi рэалii жыцця i проста асабiстая фантазiя. Сеўшы працаваць над карцiнамi для новай экспазiцыi, мастак, з яго слоў, загадзя ведаў, што зробiць. Тым не менш, яго «Дзевяць каралей» – прыемны сюрпрыз для гледачоў i самога аўтара.

В. АРЦЁМЁНКА

Назад