У пятнiцу, 13-га снежня, гродзенскiя мастакi сабралiся ў выставачнай зале на вулiцы Ажэшкi, каб адкрыць выставу «На Раство». Свае працы прадставiлi больш за дваццаць аўтараў.

Уласна калядная i зiмовая сiмволiка сустракаецца не ўсюды. Пра назву выставы нагадвае «Першы снег» В.Рамашкi, зiмовая карцiна А.Ступеня, «Бачанне пастаяннай прысутнасцi» У.Качана. Настраёва глядзiцца кампазiцыя з некалькiх работ В.Шобы са стажком, конiкам, коткай каровай i г.д. «Каложа» А.Сiльвановiча, нацюрморт з каляднай вячэрай В.Iльiной, дзве карцiны з яблыкамi – Сурава i Скамарошчанкi.