Мифы Авторынок Гостевая Редакция Контакт Архив

№ 270 от 10.04.2003  

Жаночыя фігуры Лакобы ў Інтэрнеце

З мiнулай нядзелi для шырокай грамадскасцi адкрыўся веб-сайт гарадзенскага мастака Генадзя Лакобы.

На старонцы па адрасе www.oic.unibel.by/Lakoba/ пададзена поўная iнфармацыя пра мастака, артыкулы, iлюстрацыi найбольш характэрных i вядомых жывапiсных, скульптурных работ i габеленаў.

На вечарыну, прысвечаную адкрыццю iнтернэтаўскай старонкi, былi адмыслова запрошаныя прадстаўнiкi прыватнага бiзнесу, банкiры, калекцыянеры, а таксама сябры мастака i аматары яго талента. Каларыту i прысмаку багемнасцi сустрэчы надалi бяседы пра квадрат Малевiча, шляхi беларускага мастацтва, а таксама «аўтарскае» чырвонае вiно, якое давiў сам мастак.

Генадзь Лакоба лiчыць, што «выхад у Iнтэрнет» для мастака сёння вельмi важны, бо дазваляе прэзентаваць сябе i за мяжой. Дырэктарка Iнтэрнет-цэнтра, высiлкамi якога i быў створаны сайт, Валянцiна Суворына, прызнае без хiтрыкаў, што названы праект разлiчаны, ў першую чаргу, на кола аматараў – патэнцыяльных пакупнiкоў:

-Шкада i крыўдна, калi мастак становiцца вядомым толькi пасля таго, як яго не стане. Мы б хацелi, каб гарадзенскiя мастакi дабiвалiся прызнання ўжо сёння...

Творы мастака вызначаюцца сакавiтым каларытам, сонечнасцю, а галоўная мадэль хiба што ўсiх яго твораў – жаночая фiгура ў розных варыяцыях i праекцыях.

Алена СIневiч

Назад