Такое уражанне, што напярэдаднi ўводу вiзавага рэжыму Рэспублiкай Польшча i Рэспублiкай Беларусь на Гарадзеншчыне актывiзавалiся кантакты памiж прадпрыймальнiкамi i бiзнэсоўцамi абодвух краiнаў.

На мiнулым тыднi ў Гродне адбылася сустрэча прадстаўнiкоў грамадскага аб’яднання «Клуб прадпрыймальнiкаў» з прадпрыймальнiкамi Польшчы. Польскую дэлегацыю прадстаўлялi работнiкi сельскай гаспадаркi i фермеры Падляскага i Апольскага ваяводстваў. Усяго прыехала 29 гасцей. Асноўная мэта сустрэчы, па словах старшынi клуба прадпрыймальнiкаў Франца Мамуля, – азнаямляльная. Аднак на яе былi запрошаны кiраўнiкi аблсельгаспроду i iншых дзяржаўных i недзяржаўных прадпрыемстваў Гродна. Госцi наведалi адну з самых перадвых сельгасгаспадарак вобласцi – «Прагрэс», якой некалькi гадоў таму кiраваў былы старшыня аблвыканкама Уладзiмiр Дубко. Ужо зараз, па словах Ф.Мамуля, дасягнуты некаторыя канкрэтныя дамоўленнасцi аб супрацоўнiцтве. У прыватнасцi, iснуе праэкт аб стварэннi СП па пасадцы сада. Апольская дэлегацыя праявiла зацiкаўленасць да супрацоўнiцтва i паабяцала ў лiпенi-жнiўнi афiцыйна запрасiць сваiх калегаў з Гродзеншчыны з адказным вiзiтам.