У судзе

У мiнулую сераду стала канчаткова зразумела, што шлях для закрыцця гродзенскага грамадскага аб’яднання «Ратуша» расчышчаны. Суддзя Ленiнскага суда Ганна Чылека не задаволiла скаргу старшынi «Ратушы» Аляксандра Мiлiнкевiча на пастанову адмiнiстрацыйнай камiсii Ленiнскага раёна Гродна, якая вынесла другое на працягу года папярэджанне арганiзацыi.

Нагадаю, што ў маi быў прыпынены працэс у абласным судзе па зыску Упраўлення юстыцыi Гродзенскага аблвыканкама аб закрыццi «Ратушы». Тады спадар Мiлiнкевiч падаў скаргу на рашэнне адмiнiстрацыйнай камiсii, паколькi не атрымаў запрашэнне на яе паседжанне. У ёй Мiлiнкевiч акцэнтаваў увагу суда на тое, што былi парушаны яго канстытуцыйныя правы: ён не меў магчымасцi выкласцi свае аргументы камiсii, скарыстаць з адваката. I прасiў ён у суда вярнуць перагляд справы ў тую ж камiсiю. Аднак, суддзя Чылека ўзяла пад увагу аргументы прадстаўнiка адмiнiстрацыйнай камiсii, маўляў, запрашэнне пасылалi па пошце, пасылалi нарачнага, а Мiлiнкевiч, паколькi знаходзiўся ў камандыроўцы, павiнен быў заставiць нейкi iншы адрас, каб яго маглi ў патрэбны момант адшукаць.