У гродзенскiм катэдральным саборы правялi iмшу за Васiля Быкава. Гэта адбылося 27 лiпеня. Менавiта ў гэты дзень, толькi 13 гадоў таму, беларускi парламент прыняў Дэкларацыю аб суверэнiтэце Беларусi. I ў гэты ж дзень, толькi сёлета, у некалькiх месцах горада луналi над дахамi жылых будынкаў бела-чырвона-белыя сцягi.

27 лiпеня споўнiлася 35 дзён, як памёр Васiль Быкаў. Як вядома, згодна каталiцкага веравызнання, душа нябожчыка пакiдае гэты свет на 30 дзень, а згодна праваслаўнага – на 40. У катэдральным касцёле ў нядзелю, як звычайна, было шматлюдна. Iмшу адпраўлялi толькi за аднаго нябожчыка – Васiля Быкава. Ксёндз узгадаў аб тым, што Васiль Быкаў жыў у нашым горадзе, пералiчыў ягоныя творы, нават зазначыў, што яны выйшлi накладам звыш 3.5 мiльёнаў асобнiкаў. У храме панавала гэтым разам надзвычайная цiшыня.